《台灣客家李文古話本》部分內容先睹為快

ngyiko

（《台灣客家李文古話本》原文共計11萬5千餘字，此為其中一回。敬請批評指教。）

第二十三回〈整治地理先生〉

「頭項戴笠嫲，腳踏也草鞋。手牽老牛嫲，日頭又恁烈[1]，曬到一身汗。唉喲喂。就像竹葉來做船那—無槳來。」

李文古唱等無字歌仔，逐等牛仔上埔來。

「文古，也來掌牛呣？」

草埔頂係一遍[2]墓仔埔，早就有一群掌牛刻仔[3]適該掌牛，看著李文古來仔，都走上前來問佢。

「噯，爾兜仰恁早，適裡墓仔埔號位仔[4]呣？」

李文古挑挑講笑，講佢這兜恁早在這裡佔風水位仔。

「毋係，ngaiˇ兜適裡呵，掌牛合[5]看人做風水啦。」

有人應佢。

「嘿嘿，害ngaiˇ著驚[6]一下，恅著爾兜，吂曾吂就適這號位仔喲。」

李文古笑嘻嘻个講，又這望該望，問：

「該地理先生係麼人呢？」

「毋知喲。……」

大家應佢。

李文古無等大家過再講下去，就看著一个地理先生，手項拿等一隻羅盤，這對該對，該相[7]這相。佢牛索一解，放牛仔自由去食草，就走到地理先生个脣頭，也學佢這看該看。

「ngaiˇ看看，仰？唔……」

佢頭側側[8]仔，趜到也曉風水个樣仔，相就會相，看就會看。一下仔大聲喊等：

「先生啊，歪走哩。」

「嗄，歪走仔……爾奈來个呀？」

地理先生無提無防，分佢大聲喊一下，著驚一下問佢。

「茅山。」

李文古應佢。

「爾行前啊來講，裡隻細猴仔。」

地理先生聽佢講係茅山派个，愛佢行前來講分明。

「同爾講，葬著就像蝦公樣仔——跔做一團。」

李文古品相佢選个地理無好，憾擺子孫毋會發展。

「爾再講，菸銅頭就有㘔。」

地理先生聽著，自家行上行下，選了一晝邊个風水，分一个細人仔，品相[9]到無一點仔好，譴到愛拿菸銅頭[10]來敲佢。

「先生，ngaiˇ同爾講，風水屋場[11]ngaiˇ會專，地理羅盤盡相當，ngaiˇ講爾聽試試看，菸銅放忒無相干，ngaiˇ正同爾詳細講。」

李文古無驚佢，喊佢毋好譴，又喋大話講自家風水屋場，地理羅盤，全部都會專。佢又還愛地理先生聽佢解說講分明。

「好，講著好來就無相干[12]，講著毋好爾正看，菸筒直接就鼻公項。」

地理先生擎等菸銅頭，比等[13]威脅佢講。

「無相干，先生爾坐到該，ngaiˇ講个爾要恬恬看。爾這條直線透崗頂，兩片个目珠就看月光。路頭路尾个莫講，葬著个喪事蝦蟆漂水樣。」

李文古比手畫腳，詳詳細細分析分佢聽。

「唔……ngaiˇ先菸筒放下來。」

地理先生聽到歸仔面壢青[14]。佢無想着一个細人仔，曉得恁多。接等佢又問李文古：

「來來來，先生問爾，爾講个蝦蟆漂水時係仰般樣？」

原來佢毋知李文古講个蝦蟆漂水係麼个。

「ngaiˇ同爾講，一樣十樣鬥百樣，蝦蟆漂水最難當，看有㘔無頭望望[15]。大水打來一片光。風水愛葬就好地方，愛好就愛主龍崗。」

李文古頭臥臥仔，趜屎轟天[16]个，再過講破分佢聽。

「噯，茅山。爾知識多，學問好。」

地理先生頭頷尾鑿，佩服到無話好講。

「ngaiˇ毋係茅山，ngaiˇ金瓜寮。」

李文古勢架架仔轉嘴，講佢毋係麼个茅山派，佢單淨邸到金瓜寮定定。

「細阿哥仔，該爾係麼人个倈仔。」

地理先生聽佢講毋係麼个茅山派个傳人，又共樣係金瓜寮人，就親暱暱仔[17]想愛摎佢攀親引戚，熟識一下。但係李文古無應佢，害地理先生無結無煞，就又面皮皮仔問佢：

「細阿哥仔，該毋來同先生做參考。」

講等，就愛摎羅盤拿分李文古。

「先生，ngaiˇ同爾講，對面个山坪有地方，地盤清秀好風光，正位ngaiˇ呀無愛講，爾去尋著正來葬，包有子孫做大官。」

李文古無接厥个羅盤又過講畀聽。

「該毋會帶先生來去看。」

地理先生聽講，有葬來會出大官个好地理，就想愛知係哪位。

「爾毋使鬥緊，ngaiˇ再指爾看。爾看那，左片个屻崗項，山明水秀透池塘，地理生來時一等个旺，隨葬隨發就乒乒砰[18]。」

李文古過再詳細个解說分佢聽。

「唔……這又好喔。」

地理先生聽了，頭那緊點講好，就差一滴仔無頷斷忒。

「ngaiˇ再同爾講，右片个花園項，百花齊開圓叮噹，遠看盡像龍字樣，天生自然嶄然[19]光，ngaiˇ看愛葬就愛對中央，包爾出有秀才郎。」

李文古知道，該隻地理先生本成就係半桶水[20]仔。故所，佢又比等右手析[21]山頭个花園，愛地理先生摎佢詳細看。地理先生聽佢講到有手有腳，嘴擘擘仔[22]續[23]毋記得手項還有拿等个羅盤，手一放，羅盤就跌落崩崗[24]下哩。

「先生，爾仰羅盤跌忒仔呢？」

地理先生正適該痛厥个羅盤，李文古又挑挑講。

「唉，後浪推前浪，前人死在沙灘項。今晡日[25]羅盤輸嘴角，跌忒仔就好哩。」

地理先生敨了一口大氣，搖搖頭，當低志个請李文古：

「細阿哥仔，該毋帶先生來去看。」

「噢呵，鶴佬人賣芋荷，吾牛仔走忒哩。先生，無閒正來尞。」

李文古大聲一喊，講厥牛仔走忒哩，徑直走等就去尋厥牛仔去哩，無過插該隻地理先生。

「等下來，毋怕。」

地理先生嘴肚噥噥哢哢：

「羅盤跌忒哩，爾又愛走，毋好恁尷尬啊……等下哩，細阿哥仔，ngaiˇ賺毋著食仔呢！……」

   空氣肚，有盡多个無奈何摎生活个艱辛，跈等地理先生越來越細个喊聲，傳揚到遠方。

---

[1] 音ladˋ，炙熱。

[2] 音pien－ 全部、到處。

[3] 放牛的小孩。

[4] 佔位子。

[5] 音gagˋ順和，順便。

[6] 音cog－ giangˊ吃驚、受到驚嚇。

[7] 音xiong－ 伺、視，視察。

[8] 傾斜。音zedˋ。

[9] 音pin－  xiong－ 批評。

[10] 早年吸菸銅製的濾嘴。水菸袋，或旱菸管。

[11] 房屋的地理環境。

[12] 沒關係。

[13] 用手勢摹擬動作。

[14] 整個臉鐵青。

[15] 引頸企盼的樣子。

[16] 音giug－ siiˋpang－ tienˊ 傲氣沖天。傲慢。

[17] 音qinˊ nagˋ nagˋeˋ親密、親熱。

[18] 音bin－ bin－ bon－

[19] 音zamˋ ienˇ相當的。

[20] 指學藝不精的半調子。

[21] 右手邊。

[22] 嘴開開的。

[23] 竟然。

[24] 懸崖。

[25] 今天。