好坐普通車个阿爸（徐貴榮）

huangchunbin

好坐普通車个阿爸       徐貴榮

（文刊「《文學客家》創刊號74～76頁 99.1.31出刊  新莊：愛華出版社）

阿爸一生人就好[1]坐普通車，一直就試著[2]佢係因為「省」正好坐普通車。毋過，自從該擺个事情過後，我正知阿爸還有厥[3]个哲思。

從細，就核[4]到山肚，出入全用兩隻腳，講著坐火車就暢[5]到難耐，管佢普通慢車也係快車。山路彎彎曲曲，崎又竳又嶇[6]，石碫仔一千擔，根本妄想愛騎麼个自行車。好得行半點鐘邊仔有一隻細火車頭，做得坐火車上街、去讀書。車頭脣个路忒細，無通巴士，上下就只好坐火車。這隻三等站，正停普通車定定，一日十過一二轉仔[7]，該央時係單線，快車、急行[8]除忒要相閃正會頓恬[9]，大家坐普通車慣慣。

後來，全家搬到街路，這係大車頭，大部分个車仔就有停，也無頭擺恁苦吔，阿爸還係本本坐普通車。記得做兵个時節，阿爸因為長透掛念等阿細姑，厥田分葛洛禮風搓[10]打忒，一家大細搬到台東泰源个大山肚十過年，毋知仰般仔？想愛去看啊！堵堵請著休假，該央時，部隊長一個月有送一張對號車單个公務票，部隊長堵好無去哪仔，就讓分。台東恁遠，愛先坐夜車到高雄，打早正盤巴士去台東。無想著阿爸講：「坐麼个對號，坐平快就好吔！恁多轉儘採[11]做哪轉就做得。愛買對號車單，還愛規定坐哪枋，恁費氣！」原來阿爸坐車無愛限制，儘採坐正毋會費氣。

在堅持之下，也讓一步，去買加一張對號車單分阿爸坐，轉个時節正坐普通車。從高雄轉來，急到難耐，佢逍遙自在。阿爸講：「坐普通車，慢慢仔搉[12]，慢慢仔亍[13]，看光景當好。」正到嘉義，我就坐到頭暈腦貶。阿爸講佢在嘉義做日本兵，仰般來回阿里山運糧草，囥空襲，囥炸彈。坐到台中，講二二八事變个時節，恩鄰舍到台中做事，因爭客人毋會講學老話，剃頭个時節，嗄[14]分學老人恅到阿山仔，險險分剃頭仔割忒一隻耳公。阿爸坐普通車个神情，聽佢講話，一滴都毋會啄目睡。後來，聽到肚飢，佢講到口涎波沷[15]，後生時節，完全無了解阿爸。

後來，在北部食頭路，想著阿爸長年透天盡愛[16]坐火車，不管仰般毋壁[17]，仰般無才調，又乜愛在車頭脣買屋。在車頭脣買屋哪有恁該[18]？好得戅人有戅福，省屎省尿正會在中壢後車頭無幾遠仔个重劃區，買著一垤地來起屋。想將來，阿爸不論寅時卯時來，毋使再坐巴士，行一下仔就到吔；係無愛歇，星光半夜愛轉乜做得。最要緊个係中壢係大站，阿爸毋使恁衰過去坐普通車，坐快車乜做得。

有一擺阿爸來，食飽夜一定愛轉，想阿爸恁老，又暗吔，愛轉就較遽兜仔轉去，大主大意買自強號分佢，無想著嗄分佢刻到臭頭。「買自強做麼个？還愛去哪隻車子坐正做得，我無慣坐恁遽个車仔！」阿爸講愛去退票，實在無了解，就毋分佢退票，強送佢去月台等車。這擺事情大條咧！十點零，老弟打電話來，問阿爸有轉無？結果無轉到，一暗晡急死兩兄弟，電話攏上攏下[19]，阿爸又無手機，愛哪仔[20]尋人？

原來自強忒遽，無一隻車頭，一隻車頭吔看，阿爸眨一下目，嗄坐過頭，竹南無下著車，一直坐到大甲去。好得大甲還有一枋休列車[21]，無想著十分夜咧！阿爸目睡摸些，咻一下，竹南又無下著車，坐到終點新竹正分驛夫仔[22]逐下來。半夜仔車停人尞，單人獨馬坐到新竹車頭，蚊叼蚊啄，肚飢嘴渴，又寒囉囉仔，緊想緊繾[23]：「係毋係[24]阿榮仔強強愛買自強號，暗晡夜正毋會在這受孤栖。」等到臨天光仔，正坐新竹發个頭枋車轉去，大家正敨一下氣。

經過這擺，仰仔乜毋敢喊阿爸坐快車吔，正了解，阿爸好坐普通車，毋係純粹个「省」定定，還有「慣」吔，坐上去愛一隻車頭、一隻車頭吔看，看光景，看人情，過後阿爸就有「古」好講，阿爸係看「車頭」坐車个，盡重要个係阿爸坐車無愛有限制，無坐慢車仰會做得？


--------------------------------------------------------------------------------

[1] 好 hau  喜歡

[2] 試著  cii doˋ 以為

[3] 厥 giaˊ 他的

[4] 核到 hed do 住在

[5] 暢 tiong  高興

[6] 又竳又嶇  又直抖又陡

[7] 一日十過一二轉仔  一天十一二班車

[8] 急行 gibˋ hangˇ 日語，特快車

[9] 頓恬 dunˋ diamˊ  停頓

[10] 風搓 fungˊ caiˊ  颱風

[11] 儘採 隨意

[12] 搉 kog 敲

[13] 亍 cogˋ 隨意的走

[14] 嗄 sa 轉折副詞 結果、卻

[15] 口涎波沷  口沫橫飛

[16] 盡愛 最喜歡

[17] 毋壁 沒能力

[18] 恁該 這麼容易

[19] 攏上攏下 攏 long  通，意為（電話）「打來打去」

[20] 哪仔 哪裡

[21] 修列車 日語 最後一班車

[22] 驛夫仔 日語 火車站務員

[23] 繾 kienˋ 生氣

[24] 係毋係  要不是

kaggarin

母语写作，赞！
兜话“省”系“俭”（khiam31）。

hkguu

1. 目前, 客話還有盡多字, 無定論.  寫一長篇, 有疑義个地方難免會 i ( 異?) 多.

2. 就#3樓所選个這段來講

a. 一直就"試"著(覺得).  "試( 用也、嚐也)"或該為"識"(知也、認也)
b. hed ( 長期住), 同 hiedˋ( 歇, 短期住)是否為同一字?
c. 崎又竳又嶇.    denˇ或為"挺"音轉.  "嶇" ( 路不平) 優於"歧" ( 路分岔).
d. 石碫仔一千擔.   "碫", 宜作"段".
e. 火車頭( 車站).     頭??
e. 正(才)停普通車定定(而已).   "正??", "定定??"
f. 車頭脣( 邊).     "脣"(口邊), 並不比"漘"( 水邊)差
g.....

  這些地方都還有一些討論的空間, 希望有機會釐清

來客

如何在深奧&通俗間，取得平衡?!

===
本字，尤其係已經偏離"常用字/次常用字"箇本字，同嚴管，或者[本字/讀音版]肚討論，當然係當好當讚箇事情。

至於 - [傳承] ..
首先愛搣清楚箇，來客認為係: 處於[承]狀態箇承接人有/無承接能力，願不願承、能不能承箇問題。

抵平常個場合，亦或者向細兒、細阿哥、細阿妹.. 探討佢等人輕易不能理解箇、嚴管等級箇、專門嗜好級箇事務，正正係斷自家[傳]箇路。

有[傳]無[承].. 怪怨麼儕? 毋係麼儕! 每毋係別人! 就係捱等儕........

來客

專專抵箇展哪只字該樣般愛樣般寫，實際上從來盲識寫有半篇別儕看得識文章箇[打醬油]者，來客建議:轉屋傢歇睏下~