涯當好看个電視節目

天天樂

涯當好看个電視節目
各位評判先生，各位同學，大家好！涯係第1號。今晡日涯愛演講个題目係「涯當好(hau)看个電視節目」「涯當好看个電視節目」

這(ia)下个電視臺提供(giung)大家盡多个節目，涯好(hau)看電視个原因，乜(me)就係因為電視節目又好(ho)看、又好笑、又過恁(an)生趣。其中涯特別好(hau)看公視播出个節目「下課花路米」，佬(lau)一齣(cud)卡通節目「海賊王」。

「下課花路米」，涯從一年生就看到這(ia)下，已經有五年吔(e)，麼个係「花路米」呀？聽起來還趣怪哦(o)，先生佬(lau)涯講，噢(o)！原來「花路米」就係英文follow me 跈(ten)涯來个意思啦！

「下課花路米」係一齣(cud)兒童鄉土節目，介紹臺灣各地个風土人情，係當贊斗个節目，大家愛逐(dag)日記得收看喔(o)。

這(ia)隻節目有三儕(sa)人，一個係阿賢仔(e)，一個係阿輝仔，還有一個係細兵仔，渠三儕(sa)人係好朋友，佬(lau)其(gia)隔壁鄰舍「豆油伯」借著(do)一間無用著(do)个倉庫，改裝到即(jid)家个秘(bi)密(med)基地。

渠三儕人在(coi)這秘密基地項讀書、搞料(liau)、做實驗，討論各種个問題。像上擺，涯跈(ten)等渠三儕人去臺灣个每一隻(zag)所在，對臺灣个鄉土環境有較(ka)多个認識，故所大家愛多看「下課花路米」這隻節目，渠正經做得增廣大家个見聞，還過學著(do)生趣好搞个東西！

另(nang)外，像卡通「海賊王」，裡(di)肚个內容千奇百怪，像有一座奇妙个海島，裡(di)背有一條大蛇哥，還有各種人物，圓身做得變大變細个魯夫、三刀流索(sog)隆，神偷娜美、愛講花撩(liau)个騙人布，佬(lau)涯帶入想像个虛幻世界，分(bun)涯看到如(i)癡如醉。

涯輒(jiab)輒會想像即家係功夫一流个魯夫，對抗千軍萬馬，毋(m)管對手有幾厲害，涯輕輕鬆鬆就打贏渠，係涯用吾(nga)个腳掃(so)哇過去个話，無(mo)一儕做得閃益走；有成(sang)時，涯又會想著(do)即家个雙手，各擎(kia)等一支長長个寶劍(giam)比來比去，又風神又勇敢；或(fed)者又會想像即家係一個「騙人布」，手項拿等彈弓，拈(ngiam)起地泥項个石頭，射出一粒一粒个子彈，佬(lau)敵人打到落(lag)荒(fang)走到尾瀉(xia)屎。

涯非常喜歡這齣(cud)「海賊王」个卡通，係汝有閒來到吾(nga)屋家聊(liau)，來到吾(nga)个間房，汝定著(cog)會哇一聲个喊(hem)出來，看著(do)歸間房有關海賊王个東西，分(bun)人看到目金金，從這(ia)位就知，涯係仰般个迷海賊王啊！

好(ho)看个電視節目分(bun)吾(nga)个日仔(e)過來多采多姿，分吾(nga)个生活留下靚(jiang)靚个色彩，經過涯一番个解說，汝係毋係有兜心動吔哪？歡迎汝收看「下課花路米」同「海賊王」喔。

吾(nga)个演講講忒哩，恁仔細！