伲爱系嫁兵瞒就嫁兵瞒了（艰苦，全文兴宁话）

大漠清秋

新王屋同金泉刘屋隔壁，本来一直都系和平相处嘅，自从二只屋都想系中间界块地方建猪厨后，矛盾就开始来里了。
        开始二只屋嘅人还互相让亚里，尾下大家都没心情，齐家都动手建起来，看瞒先建好就想赌蛮变到自己姓下的地方。新王屋人都系好读书嘅，屋家教书先生都有四五只，佢界嘅人精到死，请到系多泥水师傅来做，工程进度紧快。眼看自己家就可能输兵新王屋，金泉刘屋嘅刘族长十分火着，佢带能南洋拿转来嘅左轮枪去从新王屋嘅族长。二只人炯讲讲呈吾醒，刘族长就拿到枪对新王屋嘅门口塘打三枪，佢话新王屋嘅人系还来抢建猪厨，就矛人情讲，直接枪煞亚去。
        新王屋人吓到惊亚死，又吾肯捉到地界白白里送兵刘屋人，王族长缅到老王屋的王大善人同刘族长系亲家，就买到系多东西去从佢，想佢做和头，看亚里事情有商量矛。王大善人听到王族长讲起里件事，佢话：“一边就系亲家，一边又系姓下，手心手背都系肉，涯也吾方便出面。”
        王族长东西又了得里，事情又吾能办到，十分没面子，又吾敢发火，灰溜溜走转新王屋去。佢妹里兰招麻话：“阿爸，涯就有方法，系搞掂里，你就爱兵涯嫁华个里！”兰招麻紧似意屋家嘅华个里，王族长缅到十分少人共屋人结婚，过里华个里又系县中队吃粮嘅人，日夜讲共产党差吾多就可能打到兴宁来了，什分吾老神，佢就吾准兰招麻同华个里来往。
        里下王族长矛法了，就问兰招麻有末哀办法。兰招麻话：“初十华古里就放假转屋家，涯搭只信话佢也带县中队嘅枪转，也系刘屋打几亚枪，就吾惊佢。”
        王族长矛办法，佢抵里件事搞吾掂，肯定族长都矛当食亚，矛办法，先听能妹里嘅话来。
华古里转到屋家，见守阿爸哀里就来从兰招麻。摆摆佢二个人捞能聊，华古里都爱系纳兰招麻嘅乳姑里。今摆兰招麻就矛兵佢纳，佢话华古里：“伲系敢出头，帮到里涯阿爸，一生年也尽伲纳，何必急在一时半下？”华古里本来十分谷，听到兰招麻一讲，缅亚里也什么有道理，当下就摄能枪去猪厨界看。看到新王屋里向已经停工了，单刘屋请到嘅泥水师傅系界做，刘族长紧难捱嘅样女系界监工。
        华古里话刘族长：“涯今日转来休假，十分想同伲搞杯酒来。”刘族长抵华古里来者不善，还系紧笑脸话华古里：“好啊！酒涯家就有了，伲带到有城肚里嘅菜矛？”华古里话：“吾使城肚里嘅菜了，涯打几只鸟里绑酒就够了。”话盲能讲完，佢拨出枪对能竹头上连打二枪，二个罗毕里兵佢打亚下来，刘族长吾能看过惯准的枪法，当下吓到脸都青亚。
        二边都开枪了，事情搞到铁过大，王大善人快喊到二边来食酒。最后就讲到系县长界打官司，齐家都吾系走后门，县长判到酿瞒就酿瞒。
        第二日，二只屋嘅人都系县上告状。县长话：“里件事也好办，矛主地方就看瞒先建，先建者先得。”他同二家讲好明朝日就系实地看亚里。
        夜埔神，全只屋人都睡目系得了，华古里柄柄里约兰招麻系西沟边上坐。兰招麻话华古里：“伲也好本事里，枪法惯准，搞得刘屋人吾敢乱来。”华古里话：“伲爱涯做末哀，涯肯定做好来。”兰招麻钉起头那问华个里：“伲枪带出里矛也？涯想看亚里。”华古里话：“带出里，就食裤头带上摄能。”边讲佢就拿到兰招麻嘅手去裤上摸，兰招麻吾能缅到华古里搞佢板头，一摸亚去，摸到叭烧里，麦硬里嘅东西，佢尽笑又尽骂：“死狂鬼！！”
        二只人吾都觉过里，看到刘屋嘅猪厨有火，过多成碗饭时间又矛亚。过多一下里，佢二只人偷偷里系看亚里，鼻到有烧秆灰嘅味道。华古里拿到县中队发到嘅电石打火机打着火一看，占抵刘屋人拿火烟来熏屋，看亚系就过旧。佢二只人赶快转屋家去，造醒王族长讲到兵佢听。王族长听亚到，火叭着：“佢亚姊涯屌里嘅了，快去喊到几个叔公来商量亚里”
        第二日，县长来看现场，二边猪厨看得几亚遍，当下也吾能讲末哀，就喊二只族长转县上系结案。转到县上，佢话刘族长：“涯也十分同情伲想捡到界块地方来，但系看伲界嘅猪厨拿到秆火熏过里，地泥下有秆灰，火烟味也浓亚死。新王屋嘅猪厨，结到几亚张蛛网，里只系作吾到假嘅，新王屋先建证据确切，伲刘屋吾妹再争了。”刘族长眼扁扁里，矛搭变。
        王族长里摆就得胜了，转到屋家栲得几亚碗烧酒。佢老婆刁满娘话煮饭了，来到灶间里尽系界骂，话灶间里嘅秆少了几亚把，吾抵奈只贼古佬偷到系。新日麻瞒又同佢搞亚坏，单应到一个圆圈里。王族长边听边笑，也吾声末哀，巷许身拿到日麻圈里紧细心捉到贴到嘅蛛丝拈得系。
        突然佢又缅到一件事，大声尽喊兰招麻：“死猴麻，涯也话吾听伲了，伲爱系嫁兵瞒就嫁兵瞒了！”

老马识途

哈哈
你讲既耐下里既事野？
吴田听老啊里