客話講古「毋貪財个人」

LoiLiauHag

http://www.oliodu.com/upload/m3tam2coi3ge1ngin3.mp3

客話講古【毋貪財个人】

當久當久以前，在廣東江西省合界个所在，有一隻茶亭，該位仔有一位賣茶个人，安到黃大方，這儕人靠等一片賣茶一片做草鞋，賣分過路人个方式，來討生活。

有一年冬天，有一位江西个地理先生，將其五十个銀，放到錢包肚，準備帶轉屋家過新年。在經過茶亭食茶个時節，佢續錢包仔放到茶亭項，續毋記得帶著吔，故所，一直到渠出哩廣東地界，正想著這件事情，渠想愛倒轉去拿，但係又愐著路途遙遠，同時人又講「黃金落地眾人財」，定著係無法度拿轉來个，故所只好認衰，無愛再倒轉去拿錢包仔吔。

第二年个春天，地理先生又到廣東去經商，到吔茶亭个時節，看著黃大方先生，本本還在該賣茶做草鞋，就感覺已奇怪，心肝肚想，怎麼舊年留著个五十个銀，佢係收起來，無論做麼个生理乜有吔本錢，仰會還會在這位賣茶呢？」

故所佢就開嘴問黃大方先生講：「黃先生，汝仰會還在這位賣茶呢？」黃大方先生就應講：「先生，係毋賣茶愛食麼个？」地理先生就講哩喲：「吓，舊年冬下時，毋係有一隻錢包仔，放到這位，汝毋會拿去做其他个生理喺？」

黃大方先生就講：「先生，既經拈著有拾過隻這種錢包仔哩，就在吾樓頂項，汝自家去尋看哪，看看有若个錢包仔無，但係，毋好拿差別人个喲！」

地理先生上樓一看，斷真有已多大大細細个錢包仔，佢就從當多个錢包仔肚項，尋著自家該隻，拿起來一算，五十个銀，一隻都無少，心肝肚非常个讚歎講：「啊！黃大方先生正經係一位了不起毋貪財个生理人哪！」

以上錄自徐運德先生所編个【客話講古三百篇】

故事下載：
http://www.oliodu.com/upload/m3tam2coi3ge1ngin3.mp3

以上故事有兜字汝係看毋著，請先下載客家造字檔：0.8M　
http://www.oliodu.com/upload/hag4ga2c3fi1.zip
下載完畢，請先讀 Readme.doc