客話講古「狗肉陳个由來」

LoiLiauHag

以下故事有兜字汝係看毋著，請先下載客家造字檔：0.8M  http://www.oliodu.com/upload/hag4ga2c3fi1.zip  下載完畢，請先讀 Readme.doc

「狗肉陳个由來」
興寧有一派姓陳个人氏，毋食狗肉，安到「狗肉陳」。這背後有一隻感人个故事：

聽講幾下百年以前，姓陳个人到山頂項掛紙，因為這係老祖先，故所族人相當多，住地也已分散，有兜係從當遠个地方來个。這兜人掛紙掛忒以後，大家人就在塚埔項食當晝。因為族人難得見面，故所大家就啉酒唱山歌，食到盡歡喜。

有一位老人家，賴仔全部出去外背做頭路，孫仔又吂大，故所一儕人來掛紙。其(gia)屋家有一條黃狗仔，盡聰明，主人行到奈，佢就跈到奈。這擺掛紙，佢乜跈等來。

這位老阿伯一旦就好拂酒，毋過酒量毋大，一罐半罐啉落肚，就醉摸(mia)摸仔。佢在族人當中，輩份相當高，故所大家都向佢敬酒。陳阿伯心情相當好，不知不覺就啉多，還吂煞棚(sod pang)，就佇毋著(diau)，橫到草堆項睡忒。其狗仔乜陪到唇項，掌等主人。

食飽晝以後，掛紙个人做盡就轉去，就伸著老阿伯還醉到草堆項。山頂項慢慢仔起風。燒伸个銀紙，分風一吹，竟然著火。又順等風勢，慢慢仔緊燒緊闊。無幾久滿奈仔就燒起來哩。嚇到黃狗仔緊喊緊吠，想愛吠醒其主人。毋過，主人還當醉，仰仔吠就吠毋醒。黃狗仔又咬其衫袖，由力拉佢。老阿伯用手拍黃狗仔一下，跈等又睡忒。

火緊燒緊猛，接等就愛燒到老阿伯睡个草堆項。黃狗仔舂上又舂下，非常仔急，佢看著山下有一口陂塘，水泧(ved)泧仔，但係，有麼個辦法做得將水裝上來呢？黃狗仔，看一下仔，突然一躍(qiog)，跳出火圈，走到山下，驫落陂塘肚，將全身搵(vun)溼，跈等又走到山頂，在主人睡个唇項，翻身打滾，搵溼草仔。就恁樣，毋知走幾多轉，將主人个四圍，搵溼一隻大圓圈仔，隔斷火路，老阿伯故所就無分火燒死。毋過，不幸个係，當黃狗仔最後一到驫落陂塘肚个時節，佢續(sa)無力蹶(kied)上岸，全身緊吠幾聲，就沉落水裡肚去。

老阿伯睡當久，總算睡醒，這時節既經係臨暗仔吔。佢看著唇項个草仔、樹仔，做下分火燒淨淨，但係，自家睡个地方仰會溼(dab)仔呢，像分雨涿過樣仔。佢試著已趣怪，愐著可能係老祖先个保庇，正奮(bin)過這一劫。毋過，佢再過看真啊，發現溼草項有黃狗(lud)忒个毛，這時節佢正發現其狗仔毋見忒。佢遽(giag)遽去尋，大大聲喊其狗仔个名，佢從山頂喊到山下，總算在陂塘肚項看著其狗仔，但係，其狗仔既經浸死忒哩。

老阿伯撈起黃狗仔，揹到肩頭項，歸路仔叫等轉。路項个人聽著佢叫到恁傷心，又聽講黃狗仔為著救主人犧牲生命个故事，共樣乜流下目汁。

轉到屋家，老阿伯自家為黃狗仔釘一副棺材，用自家著个長衫弇(giem)到其身體項。第二日佢喊鄰舍(ten)手，將黃狗仔扛到山頂項埋忒。從此以後，老阿伯上山掛紙，都會到黃狗仔个墓前上香。

過以後，老阿伯發誓，世世代代个子孫做毋得食狗肉，這就係「狗肉陳」个由來。
以上故事錄自徐運德先生所編「客話講古三百篇」。