|
|
[看地方消息報導．學客家語文] 廖金明客語文(四縣腔)報導2012/12/27
本篇文章當時以客家(四縣腔)白話文書寫,並在1986(75)年8月18日分別刊載於[美濃月光山雜誌]與[六堆風雲雜誌],得到客家眾鄉親介稱說sodˋ與稱讚,本文分[語文篇&戲劇篇]兩種寫作。
在61(1972)年中秋節介暗am晡buˊ,離別多年又堵duˋ好在台北食頭路介阿庚gangˊ,阿乾kianˇ,阿明三隻猴哥,難得有機會揫qiu聚qi做一下,該ge暗晡就邀ieuˊ來共下,準備簡單的ne菜色,就食起酒來,經過兩三柸落肚以後,隻隻都係滿面通紅,豪光燦can爛lan,話緒xi也緊講緊多,講唔mˇ會束sod。
初下介時節,阿乾就談論起當前介經濟狀況kongˋ起來,佢giˇ講：當前介經濟狀況相當好,內外銷相當有姣gauˋ,房地產介價數sii也日日波動tung起來,經過一段時間介觀察,單單只有一項越來越滯ceu銷,同時嚴重的情況,將來會一日比一日較go嚴重,你等denˊ知diˊ係麼介銷seuˊ路嗎？阿庚都係學國際貿meuˋ易介,麼介世面都有詳xiongˇ細se研究過,愐menˋ來愐去,都愐唔到有麼介唔景氣,又會緊來緊嚴重介nge？豈kiˋ有此理！係he唔係me阿乾這隻猴哥食了leˇ酒,發bodˋ酒癲了neˇ啦laˇ！胡說一場！講到do舌麻跌落地,佢giˇ都唔相信,阿明又係me緊搖頭講：唔相信。
最後阿乾才大聲一講：你等這兩隻猴哥討了veˇ姐jiaˋ仔veˋ以後,就唔知蓋多半夜睡唔得,唔曾qienˇ討姐仔介單身哥仔veˋ嗎？嘿heˋ嘿！阿乾醉罔mongˋ醉,講起話來也相當有道理！同時兩手撚ianˋ手指一算,這下同一個辦公室肚裡,年紀數sii超過35歲,唔曾qienˇ討唔曾qienˇ嫁介,也有五六儕saˇ,無阿乾來講知,實在半夜都愐menˋ想唔到這個答案。實在無簡單！實在無簡單！阿乾分bunˊ人一褒boˊ獎之下,越至奢saˊ(沙)鼻起來！
接等就來一條一條介分析xidˋ講：一、先講古老言語講[天上無雷不落雨,人間無媒不成親],以前莊頭莊尾有奈nai家人介妹仔ieˋ好嫁時,大家人都知,同時媒人一日來兩三轉,唔怕將人家介戶fuˇ檻kiamˇ來踏過goˊ。二、這下係工業社會,大家都蓋無閒hanˇ,工作關係有介人,交際介範圍,只有屋家同辦公室了leˊ,愛樣ngiongˋ地ngeˊ去交對象朋友呢？三、這下住hed的le又係公寓ngiˋ,每一家都將門鎖啊va住hed住,樓頂樓下,左鄰右舍又無來住,有兜較恬(惦)diamˊ又唔曉自動去交對象朋友,包伊像跌停板的股票一樣,無人來接手,唔敢來看上眼。像這種時局與環境介影響,麼介唔會有恁anˋ多大姑婆介出現！
經過阿乾兩三點介分析,就點出[男女婚姻]滯銷介問題出來,大家將把baˋ佢介[腦之背]緊摸miaˊ,搭dabˋ稱說阿乾介頭腦樣ngiong(仰)會恁飽,想得ngeˋ到這個問題與問題發生介原因所在！阿乾同時指稱講：[涯]ngaiˇ等三人下班以後,閒到do扭neuˋ蟻ngie公相咬,無事情做,唔當三儕saˇ合作來同唔曾qienˇ嫁娶也係無姐jiaˋ仔單身介人,來創辦開一間[婚姻介紹所]好嗎？三儕有志一同就講：開就來開,驚漦xiauˇ嗄ha！阿庚又接等講：有關這件事情,不但係功德一件,又搭dabˋ一定有相當大介商機呢ne！
經過一禮拜介研究規劃以後,就決定在阿明介屋家(台北市松山路巨輪新村)正式開張起來,並在聯合報廣告版刊登廣告：[公忙之餘,當月下老人,幫你成雙,電話762-66XX]共18隻字介小廣告,奇怪！簡單兩行18隻字,一登出以後,看報紙(當時一份有三大張)介人,目珠也係當利,七早八早(無到七點)就連續有人對四面八方(基隆,屏東都有)打電話來；喂veˊ！你這係[婚姻介紹所]係he嗎？樣ngiongˋ般介紹法？
本所所長阿明就答覆；係he啦！這就係正正當當,正派介[婚姻介紹所],本所介紹介規定有三點；一、唔曾qienˇ結婚也係單身者,並誠心誠意愛結婚介人。二、有正當職業,素行無不良紀錄與不良嗜sii好hau者。三、本人親自帶國民身份證來本所登記面談。四、繳介紹廣告費$50個be銀。五、服務時間平常日暗晡頭6~10點,禮拜日朝晨九點到下晝zu六點。歸日仔leˋ電話響無停,聽唔利,嘴都會講燥zauˊ！確實半夜都無想到阿乾講：農村社會轉型為工業社中介[婚姻問題]會變啊na恁嚴重cung又病啊nga恁傷重dong！阿庚同阿乾聽到這個情況報告,心中有高度介歡喜！
第二日一下班時,三儕就準時歸到松山路介[婚姻介紹所],人都唔曾入門,就看到門介外no背,有六七儕saˇ企啊ia在該ge,當三儕一開門介時節,這恁多儕就緊緊行前來又異口同聲介問：這係同人做媒人介[婚姻介紹所]係he嗎？三儕也異口同聲介答：係he啦！這就係[婚姻介紹所]！請大家入來！這六七儕saˇ一入門,後背又跈tenˇ等三儕入來,一下仔一間屋尖jiamˊ有十過儕saˇ人,屋細人多,凳den仔又唔罅la坐,只好向眾客講一聲壞勢se！阿庚拿出登記表向眾客說明：請大家依照登記表中雙方介[姓名,出生年月日,住址,身高,體重,學歷-------]等照實填tienˊ寫,並附身份證來核對。
當填tienˊ寫好勢se以後.就同[醫生看病]與[刑事問口供]一樣,先以口頭核對所填寫介資料(尤其配偶ngieuˋ欄一定愛空白介,才有接受辦理),核對正確以後,再反問測試所填寫介有虛假無？就像34年次者生肖seu係肖seu麼介,若係大學畢業時,問佢奈系畢業,修恁多麼介課程,一多學分等等關聯性介問題,就可篩qiˊ選過濾真假,以上判斷正確時,再請指明所需求對象介條件資料。
當雙方資料健全以後,才開始進行介紹工作,首先第一講明：本[婚姻介紹所]地方又狹hab又細se,由本所將對方電話提供雙方,由雙方約定見面介[時間,地點,與方式------],同時同大家講清楚；[婚姻介紹]不比[貨物商品買賣],愛雙方合gagˋ意才做得繼續進行,千萬做唔得死纏對方與不禮對方介行為。若係見面無緣,本所會再提供雙方合gagˋ意介條件,再由雙方約定見面,次數無限,只要眾客愛遵守本所所約定介規矩來進行。
樣(仰)ngiongˋ般工作進行了ngeˇ一段時間,每日打電話來問介也有百過通,每平常日來登記介,平均也十五六儕saˇ,地方也有來自台灣全省各地,以及海外僑胞也有。在介紹中若係看到條件較差(人品)介,就無同佢收登記費(以免產生麻煩)。在禮拜日,平均也有卄零儕人來登記,記得有一個禮拜日,一下仔veˋ來了ieˇ卄零儕人來登記,屋肚裡尖jiamˊ到無moˇ位仔ieˋ分人企。該ge晡日堵duˋ好共莊頭在國防醫學院做醫生介阿滿哥來聊,一入門看到恁anˋ多人,一時著cog驚,覺gogˋ到發生麼介事情？緊緊行前來問,一問之下,才知得開[婚姻介紹所],同人牽紅線做媒人,阿滿哥續sa當場哈哈大笑,又搭dabˋ講；生sangˊ耳公到今都唔識聽過,麼magˋ介係[婚姻介紹所],這下是siiˇ分[涯]ngaiˇ看到了veˇ！實在趣妙又搭有意義！ 話講在這開[婚姻介紹所]介中間,遇到蓋多相當[笑科]介所在,使人愐menˋ想起來,肚腸都會笑痛；
案例一：有一日有一位光頂光頂,年紀數sii有62歲介黃先生(姐jiaˋ仔過身了neˇ,頭路做盡大)來登記！經過手續登記好勢se以後,本所就提供尋qimˇ一位45歲離婚介楊小姐分佢giˇ,佢看了資料以後,也相當合gagˋ意,將資料提供分男女雙方,並請雙方自動邀ieuˊ約見面。第二日佢等兩儕自動用電話相約在台北市西門町,某某高級咖kaˊ啡fiˊ廳見面。由於黃先生介姐jiaˋ仔過身了neˇ論十年了neˇ,一直都無機會再尋到對象,這下愛[相xiong親],心肚裡高興萬分,身裝也ngaˊ打扮到相當派頭。兩儕依約到場,初逢見面,心心相印,經過論點鐘介詳談之後,正知得楊小姐係黃先生親阿姊介大妹仔ieˋ！兩人並無感覺畏羞與見笑,隔日直接來[婚姻介紹所]作實況報導,並無怨嘆本所[喬太守亂點鴛鴦譜)！顛dienˊ倒do感謝本所同佢等尋轉卄年不見介親人！
案例二：有一日有一位來自高雄介王姓大頭家,七早八日擐kuan等[007名牌皮箱仔]又性急匆cungˊ匆來到本所,緊緊拿出身份證,愛來辦理介紹登記,等資料登記好勢se,進行核hadˋ對時,發現佢介[配偶ngieuˋ欄]還有姐jiaˋ仔,依本所規定,不便介紹。但是王先生(56歲)強烈要求與拜託講：細阿哥仔veˋ！[涯]介生理事業蓋大又無閒！登常來台北,需要細se姐jiaˋ仔來幫忙管理台北介事業,同時[涯]介姐jiaˋ仔在高雄同[涯][拈ngiamˊ籤qiamˊ卜bugˋ卦]講：[涯]命中係[雙妻命]介人,[涯]介姐jiaˋ仔再三喚vonˋ涯愛共快討細姐jiaˋ仔,事業與人身正會較go發展與平安！緊講緊對007皮箱仔肚裡拿出兩張佰票囥kong在資料登記表上,再三催cui促緊辦,並拜託介紹258介細阿姐仔分佢！
經辦人阿明就同佢講：根據王先生所講,確實有需要尋一位適didˋ當介細姐jiaˋ仔來幫忙,至於[雙妻命]一事,有影！也蓋多人恁anˋ地neˊ講,介紹費唔使兩佰銀,50個be銀就罅la了veˇ,這下你拿恁多,涯做得打一通(當時台北到高雄介長途電話,無直撥)電話分汝介姐jiaˋ來證明,同意有影愛分你討細姐仔,本所正來同你來介紹！[亡口]mangˇ知！話都唔曾qienˇ講忒hedˋ,這隻想利用[夜ia咪miˋ](暗中)來食野味介王先生,佢就將桌上介資料登記表一抓saˊ,落lod尾仔就愛瀉xia走！阿明就緊緊喊hemˊ佢,這兩佰銀樣(仰)ngiongˋ無拿去！王先生緊走緊講：唔使啦！該ge送分你等做辦事費用！並附帶講：千萬拜託莫打電話去高雄同厥giaˊ姐仔講！拜託愛保密噢loˊ！
案例三：有一位在郵政總局做視察介侯先生(61歲),江蘇省人,早期東吳大學法律系畢業,人生到doˋ高大又斯文,姐jiaˋ仔過身兩三年,子女又在國外,屋家淨伸(剩)cunˊ佢自家一個le人,在家生活一切靠ko佢自家,當等資料登記與核hadˋ對好勢se以後,佢愛繳介紹費50個be銀,本所無同佢收領(依當初計劃超過60歲者一切免費服務)。
該ge晡日仔leˋ在登記資料中,堵duˋ好有一位有名有地位介張女士分佢,經過侯先生瞭解以後,淨看到登記資料就像[番仔見到血]一樣,合hab合上songˊ,相當合gagˋ意。本所將大約情況分張女士暸解以後,也相當滿意,佢等兩人就互相邀ieuˊ約見面。見了neˇ面,談了meˇ話以後,倆人都係有[相見恨晚vanˋ]介感覺,尤其知得張女士以前介老公同侯先生以前介姐jiaˋ仔,同樣都當過[國大代表]。所以這兩個老人家就親像十七十八歲後生男女一樣,跌落[老來青春戀]介愛河,朝zeuˊ朝暮mu暮互相思戀！
在這甜蜜med相處了veˇ一段時間,張女士詳細認真洞察侯先生介人性以後,續投訴本介紹所講：侯先生係一個錢打卄四隻結又苛kiadˋ薄pog介人,一個高官高薪待遇介人,麼介請人客食飯,每擺baiˋ都係食一碗五個nge銀介ne[陽春麵]啊naˋ！為了這個小動作,張女士緊緊煞sadˋ車,終止行這條愛情介路,並要求物色其他合適介人等分伊！
再講侯先生分張女士抹madˋ忒hedˋ了leˇ以後,又再度要求提供合適小姐分佢giˇ,雖然本所一再提供畀biˋ(分佢),但係隻隻都係講,侯先生係世上難尋齧ngadˋ掣cadˋ(吝嗇)介男仔meˋ人,因此本所喊暫停無合適人等。後來佢自家尋qimˇ到一位花蓮介楊小姐來結婚,根據giˋ報導；侯先生結婚無到一隻月,侯先生吝linˋ毛介症頭又發作zogˋ了geˇ,兩公婆因爭zenˊ這個問題,日日吵事,最後楊女士分侯先生出手打死,侯先生出此大禍,想愛湮滅證據,就將楊女士分屍裝入皮箱,結果暴bogˋ發了[65年台北永康街分屍案],好加在這件婚姻imˊ與本[婚姻介紹所]無關！
本[婚姻介紹所]以研究並運作實際服務介精神,來研究農業社會到工業社會介中間,發生奈恁多社會介間隙(英文gap)與不足介地方,婚姻問題係一個十足介例仔ieˋ。在前後兩年介工作中,一共登記了ieˇ七佰零個人,其中麼介人等都有堵到,[婚姻介紹所]介仲介,不比一般商品買賣,一定愛雙方合意之條件下,才做得大功告成,兩年來登記七佰零人,其中只有完成七對十四個人,成績欠差。唔過做得將以上所做[婚姻介紹所]中[工作者,登記者,社會人士]介觀感,綜合提供分社會學研究學者以及大家參考；
綜合觀感一、社會結構轉型期介中間空洞(英文gap)問題：在當時介時期係農業社會轉變為工業社會介初期,因為思想與行為跈tenˇ唔到與社會轉型介腳步,造成了嚴重的nge慢婚與不婚介社會現hian象,甚siim至影響下一步介後續門題(心態&思想),影響社會秩cii序xi介多元化。假使堵duˇ到慢婚也係未婚者,千萬莫一堵duˇ到就過度關心重複提問,容易造成心肚裡介壓力。至於各人男女婚姻介當事者,也愛有所認識：[番薯大條就愛挖iadˋ,牛眼大粒就愛摘zagˋ]介道理。所以在社會結構轉型期介中間,鬧熱生趣介[婚姻介紹所]出現來填tienˊ補這隙xi空,填補社會介需要,來創造商機。
綜合觀感二、一般照客家俗語[婚姻遲早天註定],但是還有[半點]可由人,在[婚姻介紹所]中所看,不論男女有底下所講介所在,可能就會較go慢婚與較難尋到對象；
(一)男性介弱點來講；1.身材矮又細。2.人性忒tedˋ恬(惦)diamˊ,烏蠅inˇ都懶lanˊ打。3.黃狗膦linˋ得入唔得出,齧ngadˋ掣cadˋ,唔慷kongˋ慨koiˋ。4.自家四兩箕giˊ仔ieˋ無除,理想忒tedˋ高。5.男人行路蓋趖soˇ,又搭dabˋ頭磬qinˋ磬,親像屙oˊ白屎(痢疾)介雞仔一樣,唔雄頭。若係上面所講介五點都齊全介後生人,愛尋到對象確實會有困難！
(二)男性介優點來講；相反介[地痞piˇ流氓mongˇ](唔使來[婚姻介紹所]登記),雖然生到猴頭老no鼠耳,但是佢介女朋友一隻又過一隻,論起厥giaˊ女朋友介身材,體格外表都唔會差,甚siim至敢同佢賣身賣命來共下,真係奇怪,理由何在呢？這兜[地痞piˇ流氓mongˇ]介男性又有底下介特色；1.曉得慷慨又獻殷inˊ勤體貼。2.面皮賁punˊ,有膽量。3.拐guaiˋ人介口才一等會,怪唔得在一般介情況之下,就有[虎膦linˋ男人討美女,暮mu咕緣ianˇ投dauˇ男人討貓麻]介講法與事實。
(三)女人婚姻方面：有人講[女追男相似隔層紗,男追女相似隔層山],由此可見女性若係唔會驚驚縮縮,又好hau又畏vi,該就簡單噢noˊ！有幾下個父母帶等妹仔ieˋ來登記時,同樣問[愛樣般正過遽giagˋ嫁得veˋ出去]這個問題。本所同佢等建議；屋家大門鎖匙siiˇ交分伊,放伊去野,一定蓋遽giagˋ走生sangˊ(醒),唔使管恁多,該ge就蓋遽做阿公！甚siim至有人講；細妹仔若係三八,就唔使來本所登記！
綜合觀感三、為人男子大丈夫：男女朋友(公婆)相處唔好像頭前所講介侯先生一樣,為了錢財來刻薄pog枕邊
人,尤其蓋多高等知識份子,犯fam到這種症頭介也真多。結為公聲婆本是前世姻緣,[金錢如糞土,仁義值千金]何必為了金錢來計較gauˋ。但係在介紹工作中發現；後生女人愛情較go重要,愛人才。年長女人(含離婚介)麵包(金錢)較重要,愛錢財(甚至人老錢多就好)。啊！人生百百樣,看法不盡相同。
綜合觀感四、有客家基本精神介好對象：在[婚姻介紹所]介工作中,有一位長者所講：男女雙方愛有客家介基本精神；一、勤儉耐勞。二、刻苦奮鬥。三、清風明月。四、晴耕雨讀。五、光前裕後。六、祖德流芳。等六層介基本條件來做建立家庭介建構,正會幸福美滿。
綜合觀感五、凡事講究[新、速、實、簡]：當時所開[婚姻介紹所],係婚姻介紹的先鋒,生理好,做麼介無繼續做下去,因為當時[婚姻介紹]確實係[又新又實]介頭路,但係在[速度與簡化]方面,確實係困難點。故所與客戶(登記者)有講清楚,工作期限為兩年就結束sugˋ。
以上根據giˋ當時開[婚姻介紹所]介動機,事實經過,綜合觀感等實實在在記寫下來提供大家參考,本篇文章當時以客家(四縣腔)白話文書寫,並在1986(75)年8月18日分別刊載於[美濃月光山雜誌]與[六堆風雲雜誌],得到客家眾鄉親介稱說sodˋ與稱讚。
---------------------------------------------
◇本文客家(四縣)語文注解：
1.暗am晡buˊ：晚上。堵duˋ好：剛好。猴哥：同輩好朋友介暱稱。
2.揫qiu聚qi：聚會。話緒xi：話語。唔mˇ會束sod：不停。
3.佢giˇ：他。唔(毋)mˇ：不。有姣gauˋ：美好。價數sii：價格。
4.滯ceu銷：賣不出去。你等denˊ：你們。愐menˋ來愐去：想來想去。
5.發bodˋ酒癲：喝酒發瘋。舌麻：舌頭。又係me：又是。
6.姐jiaˋ仔veˋ：太太。唔曾qienˇ：還沒有。醉罔mongˋ醉：雖然醉。
7.愐menˋ想：想。分bunˊ人：被人。奢saˊ(沙)鼻：愛表現。
8.妹仔ieˋ：女兒。戶fuˇ檻kiamˇ：門檻。踏過goˊ：踏平。
9.樣ngiongˋ地ngeˊ：怎樣地。鎖啊va住hed住：鎖得緊緊。
10.扭neuˋ蟻ngie公：捉螞蟻。又搭dabˋ：而且。腦之背：後腦袋。
11.三儕saˇ：三人。唔曾qienˇ：還沒朝。恬(惦)diamˊ：靜。
12.驚漦xiauˇ嗄ha：怕什麼。目珠當利：眼睛很亮。係he嗎：是嗎。
13.樣ngiongˋ般：怎樣。50個be銀：50塊錢。傷重dong：嚴重。
14.外no背：外面。企啊ia在該ge：站在那裡。行前來：走近來。
15.跈tenˇ等：跟著。唔罅la：不足夠。壞勢se：不好意思。
16.講燥zauˊ：講到口渴。麼magˋ介：什麼。又狹hab又細se：又窄又小。
17.一下仔veˋ：一下子。尖jiamˊ到無moˇ位仔ieˋ：擠到沒位子坐。
18.著cog驚：嚇了一跳。續sa：反而。過身：去逝。
19.論十年：將近＋年。大妹仔ieˋ：大女兒。畏羞,見笑：害羞。
20.顛dienˊ倒do：反而。擐kuan等：提著。共快：快點。
21.細姐jiaˋ仔：小老婆。適didˋ當：合適。講忒hedˋ：講完。
22.[亡口]mangˇ知：想不到。[夜ia咪miˋ]：暗中(日語)。
23.落lod尾仔瀉xia走：驚惶逃走。唔使：不用。厥giaˊ：他的。
24.伸(剩)cunˊ：剩下。合hab合上songˊ：合意。每擺baiˋ：每次。
25.陽春麵：1972年最流行小碗麵。抹madˋ忒hedˋ：放棄。畀biˋ：被他。
26.間隙(英文gap)：介面空隙。牛眼：龍眼。烏蠅inˇ：蒼蠅。
27.齧ngadˋ掣cadˋ：吝嗇。忒tedˋ高：太高。蓋趖soˇ：很慢。
28.頭磬qinˋ磬：頭低低。屙oˊ：大便。.面皮賁punˊ：臉皮厚。
29.拐guaiˋ人：誘人。虎膦linˋ：口才佳但不實在。遽giagˋ：快。
30.生sangˊ(醒xiangˋ)：發情。
======= 客家鄉土語文研究工作室提供參考 |
|
狗仔卡
发表于 2013-1-6 00:41:17
变色卡
抢沙发