《台灣客家李文古話本》將出版問世

        時間過到當遽，還記得做細人仔樣，毋多知仔，一下仔自家就六十大零歲囉。有一日去好朋友何石松教授个屋下打嘴鼓，佢講著有一擺想愛請教人一息仔問題，無想著，對方續應佢講：「你就係專家仔，仰顛倒續來問ngaiˇ？」係啊，老古人言講：「愛好，就愛問三老。」ngaiˇ同何教授講：「你就係耆老仔呢。」，佢聽ngaiˇ恁仔講，也就心有戚戚焉，喊ngaiˇ共下來打拚。

        係喲，客家語言文化个傳承，愛靠大家有心去做。儕儕都愛有「捨我其誰」个認知，還有「這下毋做，天光日會後悔」个警覺。故所這隻避暑，學校放尞有一滴仔時間，就想煞煞摎「李文古」這隻客家民間流傳盡久个故事整理一下，想用客話來寫作，一來講兜古來分後撐仔聽，二來也借這種方式，摎客話用文字保留下來。

        李文古个故事傳說當多，基本項都係生趣古怪个故事。佢敢做人想毋著个事，也敢講人講毋出个話，聽著會分人含等目汁笑，也會分人噭等又好笑。故所「李文古个故事」會適大陸原鄉梅縣傳遍全梅州，由梅州過傳到閩粵贛台，一直到五大洲有客家人个地方，就有厥个故事流傳。甚至有兜地方，本成毋係李文古个故事，也會落到李文古个頭那項。這說明，李文古對客家民間社會个影響係又深又闊个。這本台灣客家李文古話本，單淨就流傳到台灣客家个部分來寫，大陸客家原鄉个部分計畫另外過寫一本，也想借這機會，去說明口傳民間文學个豐富同厥个變異性質。

        毋過，想著自家才疏學淺，毋知好自重，第一擺用客話來寫作，就敢寫到恁多，正經係屈尾牛好拂，還請大家毋好棄嫌，多多摎ngaiˇ指導。還有，今晡日敢恁大膽，通盤也係為著無愛摎客家个寶貝攉忒，想借這來拋磚引玉，希望還有像ngaiˇ恁樣个戇仔，會來共下打拚。老實講，正開始寫時，有一滴仔生疏，到這下來，ngaiˇ想同大家分享个係，天下無難事，只怕有心人。用客語來寫作，毋單淨毋係麼个難事，還盡有趣味，佢分ngaiˇ轉到頭擺還細掌牛个時節，大家混家啦仔、爌窯烳蕃薯个日仔，還有講盡多當久毋識講个客話，這正係盡過願个地方。最尾，希望客家文化永久傳承，客家語言久久長長。承蒙大家，恁仔細，正來尞。

             吳餘鎬2012年8月18日謹識於退愚廬工作室