聽講頭擺介頭擺,天庭眾仙創設了萬物以後,期望動物能夠自立自強,由天庭眾仙決議,就來舉辦一擺凡間[天下動物走逞qinˋ遽giagˋ]介比賽。並通告天下動物,各派一個代表來參加,先下並以公平介方式,將泅水介,陸上介,空中介等等分類分項來比賽,用行路在陸上介動物來講；有人類,馬類,狗類,鹿類,虎類,豬類,雞類,鵝類,番鴨類----等等都踴iungˋ躍報名參加。 聽講這個[天下動物走逞qinˋ遽giagˋ]介比賽,足足辦了一隻月才比賽忒hedˋ(比奧林匹克介世運還較go久),比賽場所(不詳),最後決賽時,狗仔得到第一名(故所到今有；頭走狗,二ngi走馬介俗語)。天庭就頒[鹿角樣]介桂冠分狗仔戴,狗仔戴了ieˇ[鹿角樣]介桂冠以後,相當風神,一奈緊憑與宣傳,由佢頭上所戴[鹿角樣]介桂冠,充分證明狗子就係天下第一會走介飛毛腿。 有一日,山頂高介大鹿仔geˋ,就來到平原iongˇ,看到狗仔戴現下[鹿角樣]介桂冠,心肚裡就想計調,愛來騙狗仔介桂冠,所以行兼到狗仔介身邊,先用好話再三介稱說sodˋ與誇獎狗仔,係天下第一會走介動物等等好聽介話以後,並要求狗仔將桂冠卸haˋ下來,借鹿仔戴一下,過癮(願)ngian一下,狗仔雖然分鹿仔再三要求,都係毋肯henˋ。當時在場介有雞仔,番鴨,鵝仔等等,鹿仔又再三要求並請雞仔做保證講：借佢戴一下,過癮(願)ngian一下就好,又有雞仔來做保證,你還驚麼介呢？狗仔聽了鹿仔樣般介講法,心就軟下來問雞仔講：有影你愛做保證人係he嗎？雞仔就拍胸大聲講：有影！所以狗仔就將戴介桂冠卸haˋ下來借鹿仔戴。 鹿仔戴了ieˇ桂冠以後,左走右走,心中相當暢tiong,並再三稱說sodˋ與誇獎狗仔與桂冠,當時看到在場介雞仔,番鴨,鵝仔等等,都係異口同聲誇獎狗仔與桂冠,狗仔續sa一時歡喜過度,暢tiong到緊碾zan。該ge當時,鹿仔看到此此景此情,戴等桂冠左走右走以後,就起梟hieuˊ度,緊退緊退介走,最後鹿仔加足馬力,反方向走向山頂高,一去不回頭了veˊ！ 雞仔,番鴨,鵝仔,狗仔等看到這個場面,一時績sa發愕ngogˋ到do呆ngoiˇ呆,做保證介雞仔還唔知好愁seuˇ,同時還同狗仔再三保證講：一定會同鹿仔討轉桂冠來還你！唔使愁！但係鹿仔走到山頂高以後,從此就一去不回頭了,所以到今,雞仔對每日暗晡(子時)一更到五更,不分發bodˋ風落雨,都在該ge大聲啼taiˇ叫gieu[鹿角還狗哥~！],[鹿角還狗哥~！],到了天光五更以後,狗仔又無看到鹿仔來還桂冠,所以心中大怒nu大譴kienˋ來抄cauˊ雞仔(雞犬不寧的典故),該時節,番鴨&鵝仔看到雞仔做保證介下場,就在身邊緊拍心肝,鵝仔訄kauˊ誚seˋ講：唔值dad！唔值dad！番鴨又暗中偷笑seu又搭緊拍心肝講：嚎hoˋ嚎！嚎hoˋ嚎！好在無做保證人！這擺雞仔是siiˇ落雨天[垓kaiˊ]稈gonˋ了neˊ！ ------------------------------------- ◆本文故事四縣腔注解： 1.走逞qinˋ遽giagˋ：比賽跑得快。頭擺：很久。 2.先下：事先。一隻月：一個月。忒hedˋ：完。 3.較go久：更久。二ngi走：第二會跑。 4.稱說sodˋ：誇獎。風神：愛現。一奈緊憑：到處炫耀。 5.計gie調：辦法。行兼giamˊ：走近：過癮(願)ngian一下：過過癮。 6.卸haˋ下：脫下。毋肯henˋ：不肯。驚giangˊ麼介：怕什麼。 7.當暢tiong：相當高興。緊碾zan：一直打滾。 8.該ge當時：那時候。續sa：反而。梟hieuˊ度：欺騙的方法。 9.發bodˋ愕ngogˋ：錯愕。唔使愁：不用憂愁。 10.發bodˋ風：刮大風。大譴kienˋ：大生氣。抄cauˊ：追。 11.訄kauˊ誚seˋ：冷言取笑。唔值dad：不值得。 12.嚎hoˋ嚎嚎：番鴨的叫聲。又搭dabˋ：而且。 13.落雨天[垓kaiˊ]稈gonˋ：下雨天挑稻草,越挑越重,喻越做越慘[垓kaiˊ]改提手部首。 14.聽講頭擺介頭擺：虛擬文章介用詞,表示[話(畫)虎膦linˋ]莫追究是sii真是假！ |
存档|手机版|返回页顶|客家风情——客家人·客家网 HakkaOnline.com
GMT+8, 2024-4-20 06:32
Powered by Discuz! X3.5
Copyright © 2024 https://www.hakkaonline.com
