時間過還遽，一年一度七月半普渡，就在紙炮聲中來結束，今年普渡因為細人仔適外庄讀書，沒斯轉屏東去。這擺普渡續冷冷落落，斯有阿爸、吾還過夫娘三儕定定，雖然祭拜好兄弟供品擺著歸桌仔，金香炮蠋也毋會少，但總係感覺少兜人氣。
拜好兄弟係臨暗仔大約六點零，天正愛斷烏該下正開始拜，供品有三牲（煠熟雞仔一個，豬肉一撩，皮蛋三個）用托盤裝，水果、糖仔，汽水、鹼粽二波，白砂糖一包、金香炮燭，中元普渡旗兩支、用量米 阿魯密罐仔（米笐）裝米八分滿做香筒插香，還過最重要係神桌面前愛放一張凳仔，凳頂愛放一面鏡仔，一支梳仔，較工夫還愛放膨粉，凳下愛放一個面盆，適背愛裝水大約6分滿，面頂愛放一條新面帕，這係愛分好兄弟盥洗用。
準備好就開始點香祭拜好兄弟，將香插佇米笐肚，在過插佇供品頂，還愛留一把香，一支一支插一路插香到路口，逐條路全部愛插，這係通知好兄弟講：吾這有準備澎派食物，請各路好兄弟前來享用。
主香燒一下後愛先燒經依衣分好兄弟換衫褲，經過梳洗打扮後就做得享用人間供品咧。到香燒忒剩一點仔該下做得再點一支香，好分好兄弟有較多時間享用，一直到這支香燒著剩1/3該下就愛燒金紙，燒好燒大銀，續等打紙炮通知好兄弟好轉咧！到這下時間頭尾差毋多兩點鐘左右，以上係拜好兄弟經過。
這係佇吾公時代，吾屋下逐年全部係這樣做，阿公交分阿爸（今年89歲），阿爸交分吾，過二年愛交分吾仔（佢這下讀大學沒轉來），這就係傳統，交下去就係傳承。
| 