《文学客家》：屘姑等路（作者：邱一帆）
屘姑等路邱一帆
佢跈著嫁妝
带等淰淰个祝福
追尋人生个春天
心肚个毋盼得
化為醺醺个相思情愁
平凡幸福个日仔
佢日日過等
總係心肚還有掛吊樣
係親情个牵引
還係鄉愁个招喚
屘姑等路
指領佢方向
該係心靈个歸依啊!
黏邊，佢心開開
就想恁樣一路行著過來
想用零星
零星个時間
畫一張心靈个地圖
在瓦析 石牯 滥泥竇肚
在竹横 樹筒 藤索底肚
尋轉古老个頭擺
係經驗 係智慧个傅承
係擔硬 係性體个遺傅
想用零零
星星个時間
畫一張生命个地圖
在田丘 河壩 山林底肚
在草樹 花香 鳥鳴底肚
尋轉自然个招喚
係變化不變个真理
係真情真性个道理
想用零星
零星个時間
畫一張靓靓个地圖
看看啊底肚
有親親个隔壁鄰舍
有鮮鮮个綠水青山
聽聽啊底肚
有生活个蟲鳴烏聲
有美妙个人情關懷
一生人完整
完整个時間
凈有幾十年完百年
除除扣扣
還有幾多零星
零星个時間
去追求心靈个良善
去追尋自然个真理
去欣赏人間个美麗
啊喔一斷真!
還有幾多
幾多个時間
完成一生人个追尋
页:
[1]